Vateyê Kalikê Mi!
Verê cû pîlanê ma seba ke hêgayanê bejikan biarisnê, yanî seba ke herrî nefes bigêro, serrêk tede genim ramitêne serra bîne kerdêne filhan. Filhan çi yo? Hêgayo ke cite biyo la semedê arisnayişê herrî tede çiyêk nêameyo ramitiş ra vanê filhan. Esas dewa ma de hîna zaf vanê şove. Tirkî vanê nadas. Hetê ma de tayê filhanan de mehsûlê ke herrî nêkenê rincan filhan de ramitêne; ma vajin nehayî, nîske, şolike, gilgil yan zî petêxî, qitikî, ecûrî, tirozî. Bêguman ramitişê enê mehsûlan zî bi usûl bi. Mesela, petêxî erdê dibûrî ke tîjî tay dana piro û rewaya binê erdî xurt a de, yanî herrîya ke ritûbetê binê ci zêde yo de ramitêne. Dewa ma de, hetê corê rezan de yew hêgayê ma yo dibûrî esto. Kalikê mi lajanê xwu rê kerdo bare. La serra ke filhan biyêne, ma hemîne piya o dibûrî de petêxî ramitêne. Petêxî zî sey kultur zaf tewirê înan estbî. Yeno mi vîr, vatêne petêxê hesenî, petêxê ‘ezoyî, petêxê mizoyî, petêxê ‘ezo-çerkoyî, petêxê şekerikî, petêxê şemamikî, petêxê deqdeqikî, petêxê zerdikî, pe