Binê Dara Valêre de

“Binê Dara Valêre de” kitabê min o tewr verîn o. Eynî wext de bi kirdkî kitabê hîkayeyan o tewr verîn o. Tede des hebî hîkayeyî estê: Huzna, Xozî Bîyê Zafî, Rem, Baba, Binê Dara Valêre de, Îtîraf, Şewa Sipî, Dîyarbekir Seranser Eşq, Şîyayiş, Tewî

Zafê enê hîkayeyan, ancî hîkayeyê ke kitabê minê hîkayeyan “Halîn” de estê, mi serranê 1990an de nuştî. Qismêkê înan mi înşatan de kaxidê çîmentoyî ser o nuştî.

“Binê Dara Valêre de” reya verîne Weşanxaneyê Apecî Stockholm de, serra 2002 de çap kerd. Dima Weşanxaneyê Vateyî Îstanbul de serra 2003 de çap kerd. Sey çapê hîrêyin zî Weşanxaneyê Roşna Diyarbekir de serra 2012 de çap kerd. Nika çapê hîrêyin zî qedîyayo, înşalah hema do çend reyê bînî zî çap bibo.

Roşan Lezgîn, Li Bin Dara Biyê, Weşanên Elma, Îstanbul, 2003, 76 r.

Hevalanê min ê kurmancan zaf meraq kerdêne ke hîkayeyê mi senîn ê. Coka semedê xatirê înan mi “Binê Dara Valêre de” tada kurmancî ser. Bi nameyê “Li Bin Dara Biyê” Weşanxaneyê Elma Îstanbul de serra 2003 de çap kerd. Nika çapê kurmancî zî qedîyayo, înşalah kurmancîya enê hîkayeyan zî do hema çend rey biginê çap ro.


Derheqê kitabê min ê tewr verîn “Binê Dara Valêre de” de çend meqaleyî nusîyayê la çiyo ke hetanî nika tewr zêde keyfê mi ci rê ame, yew mektûb bi. Murad Canşadî Hepisxaneyê Edîrne ra roja 28.07.2008 de mi rê yew mektub nuştbi. Mektûbê ci bi tirkî bi. Cayêkê mektûbê xwu de behsê enê kitabê mi kerdêne. Tam wina nuştbi:

“Seneler önce ilçenizden (Lice) biriyle karşılaştım. ‘Zazakî’ dedim. Yüzünü ekşitti. İsteksizce bir-iki kelime sarfetti. ‘Geri’ dedi, ‘ilkel’ dedi. Düzgün bir cümle kurmayı bile gerekli görmedi. Birkaç ay geçti aradan. ‘Binê Dara Valêre De’ kitabını verdim. Okuyup bitirdi. Gözlerinde oluşan ışıltı o güne kadar görülmüş bir şey değildi. Hayalistandan duvarlar arasına düşmüş gibi konuşuyordu kitap hakkında…”

Murad behsê hepisxaneyî keno. Esas neke tenya enê mensûbanê hereketanê siyasî, o wext hema vajêne kesî bawer nêkerdê ke bi zazakî edebîyat beno. La kamî ke eno kitabê mi wend, eşqê ziwanî da piro, êdî bawer kerd ke bi kirdkî edebîyat beno. Bi tesîrê enê hîkayeyan dima zaf kesan dest bi nuştişê hîkayeyan kerd.

Roşan Lezgîn, Binê Dara Valêre de, Çapê hîrêyin, Weşanxaneyê Roşna, Diyarbekir, 2012