Sanikanê Dîyarbekirî ra Guldesteyêk
Sanikanê Dîyarbekirî ra Guldesteyêk, kitabê sanikan (bi tirkî: masal) o. Kitab hetê Roşan Lezgînî ra amade biyo û hamnanê 2009î de paytextê Kurdistanê Başûrî Hewlêr de hetê Ensîtuyê Kelepûrê Kurdî şûbeyê Duhokî ra çapxaneyê Arasî de çap biyo. Qismê alfabeya latînkî 175 rîpelî, qismê alfabeya erebkî 31 rîpelî yo. Pêro pîya 206 rîpelî keno. Kitab de 20 sanikî estê. Zafê enê sanikan dorûverê Licê ra arêdîyayê. Enê sanikî heme bi veng wanîyayê û yew CD de kom bîyê. Kitab û CD piya vila benê. Merdim eşkeno sanikan hem biwano hem goştarî biko. Ena reya verên a ke yew kitabê kirdkî (zazakî) Kurdistanê Başûrî de çap beno.
Qismê latînkî de Roşan Lezgînî yew servate (bi tirkî: önsöz) nuşto. Enê servateyî de qalê taybetîyê sanikan keno, dima qalê têkilîya xwu ya taybete ya derheqê sanikan de keno. Servateyî ra pey zî yew nuşteyo derg derheqê kirdan (zazayan), kirdkî û edebîyatê kirdkî de nuşto. Enê nuşteyî de malumatê muhîmî estê. Kitab de hetê destê raştî ra qismê alfabeya erebkî de enê her di nuşteyê Roşan Lezgînî seba kurmancî (kirdaskî) tadîyayê û transkrîbeyê alfabeya erebkî bîyê. Hetê destê raştî ra sere de Enstîtuyê Kelepûrê Kurdî şaxê Duhokî bi alfabeya erebkî yew pêşek nuşto. Pêşek de bi kilmîye behsê xebatanê Enstîtuyê Kelepûrê Kurdî beno, derheqê kitabî û kirdkî de zî tayê malumatî dîyenê.
Yorumlar
Yorum Gönder