Kulo bêderman!

Kulo bêderman çi yo gelo, kam eşkeno tarîf bikero?

Ez vana “kul” û “kule” di çiyê cîya yê. Kule, yew nêweşîya fizîkî ya. Mesela, cayêkê wucûdî gêno ra, rîm keweno ci, maseno. Uca ra vanê “kule”. Muheqeq dermanê ci esto, bena weşe. La “kul” beden ra eleqedar nîyo, yew nêweşîya hîsan a, eynî sey kîne zerrî de, yanî hîsan de virazîyeno... 

Esas, ez nêeşkena tam tarîf bikerî la ez yew mesela qisey bikerî, belkî bineyke fam bibo.

Zimistan bi. Vewre erd de bî. Şinasîyêk şibi rehmet. Ma çar kesan xebere da yewbînî ke şirê tazîye. Tazîye qeza de bî. Ma telefon kerd, xwu rê ca abirna û şî çatrayê Seyrantepeyî de paweyê mînîbuse vindertî. 

Zêde ra serd bi. Dest û lingê ma cemidîyayî, çizayî. Axir mînîbuse ameye, ma weniştî. Zereyê mînîbuse teberî ra serdinêr bi, binê liganê ma heme hîy bi.

Her di apê ke emrê înan epey estbi, vernîya ma de, ez û kek Hesedula zî peyê înan de, qoltuxanê çutan de roniştî. Kek Hesedula çend serrî mi ra pîlêr o.

Sercêrê Seyrantepeyî de dikanî estê. Mînîbuse uca vinderte, çend raywanî ameyî war, şî xwu rê say û porteqalî, teftal, çî-mî erêna.

Dikandarî vernîya dikanê xwu de, textikê qaseyê porteqalan dekerdbî zereyê tenekeyî, vistbî ta. Kila adirî qasê nîm metre biyêne berz. Hesedula çim gina adir, xwu eşt war, şi destê xwu verê adirî de kerdî germin, lingê xwu qundarayan ra vetî dayî tanî ver, dima zereyê qundurayanê xwu zî kerdî germin.

Ma zî xwu rê camê mînîbuse ra temaşeyê Hesedulayînan kerdêne. O mîyan de kewt verê çimê mi ke verê berê dikanî de, binê dezgeyê meyweyî de yew kartono gird esto. Ez şiya war, mi dest eşt karton û dikandarî ra va “Eno karton to rê lazim nîyo, ez bena.” Lajekî va “Nê keko, lazim nîyo, bibere.”

Mi karton girewt ard, dergankî ser kerd di parçeyî, parçeyêk eşt binê linganê her di apan, parçeyo bîn zî eşt cayê linganê xwu û kek Hesedulayî ke lingê ma nêcemidîyê. Çimkî karton serd nêviyarneno, germin o. Xwura tavilî faydeyê ci zî bi, lingê ma tey bîyî germin.

Ma epey rayir şî. Deşte de, ê doran bi. Mi dî apan ra yew fetelîya, va “To zaf baş kerd karton ard eşt binê linganê ma. Wilay lingê mi bî germin. Homa to verdo...”

Zaf keyfê mi ame, mi bi zerrweşî va “Apo, Homa îman bido, şima dest û lingan ra nêkero.”

Apê bînî zî vateyê ci tesdîq kerdî, va “Wilay lingê mi zî bî germin.” Û bineyke vindert, dima va “Eger şima wazenê yewî bişinasnê; yan tedir raywanî bikerê yan zî tîcaret bikerê!”

Mi ferq kerd ke eno vateyo peyîn bi weşê kek Hesedulayî nêşi. Çimkî senî ke apî eno qayde va Hesedula şi pêser, pungirîya. Êdî heta ke ma şî tazîye û ageyrayî ameyî, pitî nêgina piro. Mi çend rey teşebus kerd ke ez ey vacor bikerî, bidî xeberdayiş la nê! Qet veng ci ra nêvejîya.

Kek Hesedulayî eno vateyê apî kerd kîne û dekerd xwu sîne, bi serran zerrîya ci de bi kulo bêderman mend!...

Heştês serrî ra zêdeyêr wext o, camêrd mi dir kîne keno. Eke cayêk çim gineno mi, awirê ci sey axûyê marî rişîyenê mi ser, enerjîyêko zaf negatîf dano mi. Ez pê hesîyena, eke cematêk de nameyê mi biviyaro, xaseten zî hewlîye ser behsê mi bibo, neuzûbîlah, pîzeyê Hesedulayî maseno, nepixîyeno, peynî de teqeno…

Herçî ez a, Homa şahid o, tenya guneyê mi pê yeno. Hende zeman de, zaf rey ez xebitîyaya ke cemedê sîneyê ci bihelênî la tu fayde nêkerd. Mi se kerd nêkerd, ez nêeşkaya berê zerrîya ci akerî. Welhasil, ez zî êdî biya rincan.

Rîyê enerjîyê ci yê negatîfî ver mi xwu ey ra dûrî da. Mi o hişê xwu ra sîl kerd eşt. Çimkî enerjîyo negatîf zaf pîs o, eke ez hîs bikerî ke yew derheqê mi de enerjîyo xirab xwu sîne de paweno, derhal mekanîzmayê minê xwupawitişî kewenê dewre. Ez xwu dûrî dana, bi eno qayde ez enerjîyê negatîfî yê însanan ra xwu pawena. Sewbîna çare çin o.

Badê ke ez emîn biya, kîna derheqê mi de zerrîya kek Hesedulayî de biya kulo bêderman, îfleh nêbeno, mi temamen xwu ci ra dûrî da. Labelê ge-ge tesadufen ma raştê yewbînî yenê. Mesela, ê rojan, ancî yew tazîye de ma raştê pê ameyî. Mi goş nêda ci, mi merheba zî nêda. Çimkî ez sey nameyê xwu zana, eke ez muhabet nîşanê ci bidî, xwu keno qure, sey dîkê serkewteyî xwu nepixneno, xwu çîyêk hesibneno!

Ez esla xwu kesî ser de nêkena qure, la ez nêwazena firsend bidî kes zî xwu mi ser o bikero qure.

Mi ke goş nêda ci ya! Ena rey, mêrikê ma şiyo vato “Roşanî merheba nêda mi.” Mi rê sûc dî! Hey bimbarek, dê biewnî xwu çeng hema şarî ra biçîne neng.

Heştês serrî verê cû, ti xwu rê ameyî war, to dest û lingê xwu kerdî germin. Ez zî şiya mi karton ard eştê binê linganê to û hevalanê ma yê bînan. Camêrdan xwu rê tecrube ra qisey kerd; tayê şîroveyî kerdî. Sûcê mi, guneyê mi çi bi? Enê ser o, to başîya mi ra, hewle ra hesed kerd...

Merdim xirabîye ver kesî ra xû bikero, ez vana qey bêedaletî nîya la merdim hewle ver, hewlîye ser kesî ra xû bikero, bêedaletîyêka zaf pîl a.

Xulase, kulo bêderman hesed bi xwu yo!