Şiûrê mîlî û xebata estetîkî...

Weşikî û estetîkê qapaxê kitabanê Weşanxaneyê Nûbiharî rewna bala mi antbî la mi nêzanayne kam virazeno. Ez ewro yew mesajê Facebookî ra pê hesîyaya ke qapaxê kitabanê Weşanxaneyê Nûbiharî Îbrahîm Xelîl Baran virazeno.

Min Îbrahîm Xelîl Baran tenya sey yew merdimo siyasî û nuştox zanayêne. Mi çend nuşteyê ey wendê. Gerçî terzê nuştişê ci nêmaneno siyasîyanê hemasî yê kurdan, bi terzêko akademîk û bi zêhnêko zelal nusneno zî netîce de hişê mi de yew siyasîyê kurdan bi!

Emrê xwu de tenya reyêk, serra 2015 de Kuçeyê Hunerî yê Ofîsa Diyarbekirî de yew kafe de qasê des deqayî ma piya roniştbî. Sewbîna tu munasebetê ma nêbiyo.

Mesajo ke Îbrahîm Xelîl Baranî rîpelê Facebookê xwu de weşanayo de bi tirkî vano “Zira her kitap Kürtçe veya Kürtlerle ilgili olunca yaptığınız şey kitap tasarlamak değil, bir milletin estetik değerlerinin ve bilincinin yeniden üretilmesi oluyor.” 

Yanî vano “Madem her kitab bi kurdî yan kurdan ra eleqedar o, karo ke ti kenê tenya teswîrkerdişê [qapaxê] kitaban nîyo, newe ra afernayişê erjanê estetîkî û şiûrê yew miletî yo.”

Ez bawer nêkena ke vatox ser o fikirîyayo, tenzîm kerdo û hema vato. Nê! Seba ke vatox bi xwu şiûrê xwu de wina fikirîyeno, eno hawa fikirîyayiş biyo parçeyê ferasetê ci, coka wina xwuvero binşiûrê ci ra ameyo teber. La esla yew vateyo elelede nîyo! Sey aforîzma prensîbêko bingeyîn o; gereka merdim enê vateyî sey madeyê qanûnê exlaqî qebûl bikero û heme kar û xebatanê xwu de sey emsalêkê eslî tetbîq bikero.

Çi kar beno wa bibo, wazenê siyaset yan ticaret, wazenê edebîyat yan zî yew warê bîn yê hunerî bo, eke ma yew eser anê meydan, gereka sey prensîbî ma xwu sey temsîlkarê “newe ra afernayişê erjanê estetîkî û şiûrê miletê xwu” bivînin. Eke ma bi eno şiûr, bi eno fehm û feraset karê xwu bikin, yanî prensîbê ma newe ra xeliqnayişê erjanê mîlî yê estetîkî bo, ma çi kar kenê bikin, muheqeq eserê ma zî beno eserêko cawîdan. Eger ewro hîsanê hesedî ra yan zî sewbîna sebeban ra kes teqdîr nêkero zî tesîrê xwu muheqeq hem ewroyî hem îstîqbalî ser o keno. Û xwura karê merdimî, vateyê merdimî, pratîk û pirêzeyê merdimî, hal û hereketê merdimî şerefê merdimî yê! Keso ke şerefê xwu zano şerefê miletê xwu zî zano...

Hem karê eyê rindek û estetîkî ra hem enê vateyê ke sey prensîbêkê zernînî ma rê tewsîye kerd, ez Îbrahîm Xelîl Baranî zerrî ra tebrîk kena. Ez hêvîdar a ke miyanê miletê ma de merdimê winasî bizêdîyê.