Swêd de moda

Weqfa Kurdî ya Kulturî li Stockholmê seba ke Diyarbekir de semedê tutan yew merkezê kulturî akero sey proje Swêd de merkezê Astrid Lingren ra fon (ardimo madî) girewtbi. Roja 05.10.2006 de bi nameyê “Navenda Kitêb û Çanda Zarokan” Diyarbekir de yew merkez akerd.

Mesûlanê Weqfe mi rê teklîf kerdbi ke ez enê merkezî de bişixulî. Çimkî verê cû zî înan yew projeyo zaf rindek viraştbi, se hezar kitabê tutan bi kurmancî û kirdkî amade kerdbî, ardbî Diyarbekir de kerdbî vila. Dima hîris hezar hebî zî îlawe kerdî. Mi qasê 500 hebî kitabî înan ra girewtbî û mi bi xwu kerdî vila. Mi enê kitabî wina rasgele nêdayne kesî. Yan kesê eleqedarî bî yan zî mi ê mûsnayne wendişê kirdkî hema kitabî dayne înan…

Mesûlê Weqfe ena xebata mi ra xeberdar bî, coka înan waştêne ez “Navenda Kitêb û Çanda Zarokan” de bixebitî. Ma qisey kerd, pê kerd. Ez pawena ke ha ewro ha siba dest bi kar bikerî. La bêke tu xebere bidê mi, mi hew dî ke herinda mi de yew merdim Dortyolê Antakya ra dayo ardiş, ho uca xebitîyeno.

Dima ez pêhesîyaya, namdarêkê ma wina kerdo. Eynî siyaset ra yenê, serranê 1979-81 de eynî mekteb de malim biyê, filan û bêvan…

Eyla siyasetê ma kurdan zî eynî sey xûyê eşîrtî yo!

Mi ey rê yew e-mail şirawit, mi waşt bizano ke xebera mi kerdenan ra esta. La mi mesela nêkerde derg. Mi rê çiyo muhîm Diyarbekir de abiyayişê merkezêkê winasî bi. Labelê înşalah rojêk ez enê çiyan nusnena…

Axir çiyo ke nika ez wazena behs bikerî, yewna çi yo.

Bi munasebetê Diyarbekir de abiyayişê “Navenda Kitêb û Çanda Zarokan” mesûlanê Merkezê Astrid Lingren ra çend kesî Swêd ra ameybî. Salona sînemaya cêbî ya Beledîyeya Girde ya Diyarbekirî de yew panel ame dayiş. Swêdijan qisey kerd. Nuştox Firat Cewerî zî tercumanî kerde.

Ez zî şiya, mi goşdarî kerd. Ê swêdijan ra yew cîneke qiseykerdişê xwu de va: “Wexto ke Parîs de, London de, kinc û lîbasî moda bî, wexto ke welatanê Ewropa de otomobîlî moda bî, terzê mobîlya moda bî, şima zanê Swêd de çi moda bi?”

Persa xwu persa û vinderte. Firat Cewerî tercume kerd. Dima, cîneke wina cewabê persa xwu da, va “Zanayiş!”

Û dewam kerd va “Swêd de zanayiş moda bi. Her kesî waştêne bizano. Însanê ma, seba ke zanayişê xwu aver biberê, şiyêne dinya ra geyrayne, kitabî wendêne, cigêrayiş kerdêne. Yew war de, sehayêk de, dîsiplînêk de biyêne pispor. Biyêne wayirê malumatî. Dima derheqê ê çî de semînerî dayne. Çi mûsayê, çi zanê, çi malumat dayo arê, miletê xwu dir kerdêne bare. Zanayiş û tecrubeyê xwu nuştêne. Welatanê bînan de kincî, erebayî, mobîlyayî moda bî, ma het moda zanayiş bi. Bingeyê medenîyetê Swêdî de ena moda esta…”

Duwês serrî ser de şî. La a roje û ena roje, enê vateyê a cîneke mi vîr de yê.




Yorumlar