Qerarê qertalî

Efsane ya yan raşt a, ez nêzana la vanê miyanê teyran de tewr zaf qertal cuyeno, qasê hewtay serrî emir keno. Eno zî teqrîben qasê emrê însanan o. Labelê seba ke bireso enê emrî, çewres serrîya xwu de gereka qerarêko zaf cidî bido. Çimkî gama ke emrê qertalî beno çewres êdî esnekîya pencanê ci şina, nêeşkeno seyd bikero. Nequra ci bena derge û hetê sîneyê ci ser bena çewte. Pûrtikê ci zî benê qalindê qertî, nêeşkeno asan bipero.

Enê halî de di rayirî vernîya qertalî de estê; seba ke nêeşkeno seyd bikero û werd biwero, coka yan xwu kişeno yan zî xwu newe keno.

Eke qerarê xwu newe kerdişî bido, cayêko berz de xwu rê qulê zinarêk vîneno û dekeweno ci. Nequra xwu dano zinar ro, heta ke qirm ra şikîyena. Uca vindeno heta nequra ci newe ra bêro. Eke nequre ameye, ena rey dest pê keno, bi nequra xwu ya newîye pencikanê xwu kok ra keno we. Ancî qul de paweno ke pencikê ci newe ra bêrê. Dima dest pê keno, heme pûrtê xwu yê qertî rûçikneno.

Welhasil qasê wextêkê panc aşman de nequre, pencikî û pûrtê qertalî benê newe.

Eno qerar û caardişê ci zaf meşaqetin, zaf bi dej o. La eke qertal enê zehmetî bido verê çimî; nequre, pencikî û pûrtê ci benê newe. Badê enê newebiyayişî qasê davîst-hîris serrê bînî cuyeno.

Ez vana raşt yan efsane bo, seba ma însanan hende zî ferq nêkeno. Merdim eşkeno xwu rê ci ra derse bigêro.