Tirkîya Çewlîgî

Payizê serra 2008î de semedê yew panelî ez û çend hevalî ma şî Çewlîg. Panel derheqê Mewlidê Kirdî yê Ehmedê Xasî de bi.

Badê panelî ez û kek Doğan û çend hevalê ma yê Çewlîgî ma şî yew qehwexaneyê verê Camîya Hecî Xidirî de roniştî. Çend kesê ke mi newe şinasnayne zî ma het bî. Înan ra yewo ke emrê ci pancas ra cor bi, panel de Mewlidê Kirdî erênabi, miyanê destê xwu de wina sey lûleyî piştbi kerdbi rulo. Yewêko esabî aseyne, damarê milê ci masaybî, rîyê ci sûr bibi. Bi vengêko hêrsin mi ra va “In kaar ik şima hê kên weş min a nêşi!”

Mi bineyke ewnîya, dima mi bi feko weş va “Qey?” Va “Şima zon ma xerfnîn!” Yew hewayo serdin virazîya. Ez bineyke fikirîyaya, mi va “Dê yew nimûne bide, mesela, ma senî xeripnenê.”

Mewlido ke sey rulo dest de bi, eleusûl akerd, misraya verîne yê beyta 88. wende. Va “Weqto nûrê Ehmedî anya te ra” û vengê xwu hîna zaf kerd hêrsin, va “In qêde çî ben?”

Mi va “To gore gereka senî biyêne?” Va “Ma vûn ‘Wext ig nûir Ehmêd ûnya tira.” Mi bi fekê Çewlîgî va “In Molid, se sêrr cuwa ver nusîyayo, ma nîyenuşt.”

Welhasil derheqê ziwanî de meseleyê ma û hevalanê ma yê Çewlîgî zaf ê. La badê ke mi ena tirkî dî, yanî mi dî ke tirkî zî sey xwu nusnenê, ez êdî çewligijanê ma dir ziwanî minaqeşe nêkena. Feqet êdî ez înan ra pawena ke tirkîya nuştekî rê zî îtîraz bikerê.

Enê afîşî bi tirkîya Çewlîgî nusîyayê, la mi gore gereka wina binusîyayne:

-Hele bir buçıx metre uzağ dur êle qonışax.

-İnsan bilmêr insanın önınde ne war!

-Allah vêre sen herkesi xeste êdesın.

-Sen odır nêreye gidersın êle maskesız?