Kabusê Korona

Vizêrî nê perey, hela şanî, mi hîs kerd ke qirika mi veşena. Zereyê qirika mi wina sistek gizgizîyayne. Labelê mi goş nêda ci. Şan de, saete dorê yewendesî ez kewta miyanê cayî. Veşayişî dewam kerdêne la ez şiya hewn a.

Bişewe ez biya aya ke canê mi veşeno, veşayişê qirika mi zî zêdiyayo. Zereyê qirika mi de, qasê rêça serê engişte yew ca veşayne. Veşayişêko gircikin, eynî seke yew girnûge dekewta qirika mi…

Ez nişka ra perraya xwu ser. Mi xwu rê va “Wulay ez bi janê korona kewta!” Wina xilmaşê hewnî ez wurişta şiya mitbaxe. Mi sûrgulik girêna, dekerd fincan, nîm lîmone zî esirna ser. Eno payîz ma dewe ra ardbi, mi şinawito vanê nebatê welatê merdimî merdimî rê şîfa yê. Mi yew heba sereyî zî werde û ser de çaya xwu şimite. Qirika mi bineyke nerm biye. Ez ameya kewta nivîne. La hewnê mi herimîya!

Mi xwu rê va ez qetî bi korona kewta. Êy temam, ez bi korona kewta, eyla mi ena mîrate ça û kamî ra girewte?

Mi a roje ra dest pê kerd û hetanî hewteyêk ez apey şiya. Mi saet bi saete her çî ard xwu vîr ke ez şiya kamca, kam ameyo nizdîyê mi. La mi çiyêk safî nêkerd, ez nêresaya yew netîce.

Hetanî serê sibayî nivîne de mi xwu nat qelibna wet qelibna. Veşayişê qirika mi kêmî nêbi, zêdiya. Êdî mi tam bawer kerd ke ez bi korona kewta.

Ez ne tam aya ne zî rakewte ya. Şiûrê mi ge şino ge yeno. Mi va beno ke ez nêfelitî. Çimkî ena nêweşî zaf kone ya, her kesî de tewirêk xwu nîşan dana.

Mi mergê xwu ard verê çimê xwu, mi va ez mirena. Mi xwu rê duayî kerdî ke qet nêbo ez zêde ezîyet nêancî, wa mergêko rehet bo.

Heyatê mi pêro sey şerîdê fîlmî verê çimê mi ra vîyart. Çend rey îşkencexaneyê tirkan de zî wina amebi mi sere. Hela tenge de, heyatê mi sey fîlmî verê çimê mi ra vîyartbi…

O wext zî nika zî, heq û hiqûqê însanî nêame mi vîr. Çimkî heyatê xwu de esla mi hiqûqê însanan îhlal nêkerdo, mi heqê însanan nêwerdo, mi bêbextî zî bi kesî nêkerda. Neyarê mi bo zî, ancî ez xirabîya însanan nêfikirîyena. Wazenê madî wazenê manewî, mi tim waşto her kes mi ser ra bo. Û zanayişo ke Homayî kerdo qismetê mi zî, eynî sey zekatî, mi tim waşto ez qismêko muhîm bidî telebkaran. Eger nêwazê zî ez binusnî, eynî seke cayêk de ronî, êdî kamî rê lazim bo, kamî waşt, wa xwu rê uca ra bigêro.

Herçî ez a, heq û hiqûqê mi zaf îhlal biyo, neheqî zaf bi mi biya. Labelê kesê ke heqê mi werdo, hiqûqê mi îhlal kerdo, neheqî bi mi kerda, mi teslîmê Homayê xwu kerdê û hişê xwu ra, vîrê xwu ra esteritê vetê. Eynî seke merdim şiro mehkema de dehwa akero û teqdîr paweyê hakimî verdo. Êdî ê û Homayê mi xwu rê se kenê, ez nêzana. Yanî neheqîyê ke bi mi biyê zî nêameyî mi vîr. La xebatê min ê nîmcetî ameyî mi vîr; enê xebatê min ê nuştoxîye. Tayê xebatî destê mi de estê hema temam nêbiyê. Ancî, tayê xebatê başî zî mi dayê xwu ver, eger qismet bo, ez wazena înan zî bikerî. La mi va herhal enê manenê. Û enê panc dersê min ê peyînî yê unîversîte zî ameyî mi vîr. Homa hes bikero, ez eno gulan de mezûn bena. Biyî hewt serrî ke eno emr de ez berdewam wanena, mi hende zehmet dî, ez ameya resaya peynî. Labelê ez ha bi korona kewta! Mi va, herhal dîploma zî qismetê mi de çinê biya. Ez zaf kewta ver…

Miyanê enê xayle û xarboleyan de serê sibayî diya. Ez şiya mitbaxe, mi cezwe de awe kerde germin, tayê sole dekerde miyan, qasê di kewçikî sirke zî îlawe kerd û sey xerxere taçarna fekê xwu. Mi sereyê xwu baş acor wedart, awe şî gina peynîya qirika mi ro, resa o cayo ke veşayne. Eynî seke awa oksîjenî bikerê birîna tezîye ro, wina kijjînî ci ra şî, dax kerd. Qasê nîm saete badê, mi eynî çî tekrar kerd. O veşayişê qirika mi bedilîya, ena rey, seke tehrîş biyo, o qeyde deja.

Badê areyî, mi yew heba sereyî werde, ser de di qedehî çaya nebatan şimite, xwu kerd binê betanîya ke şirî hewn a. Ez nêzana gelo ez rakewta yan nê, la mi hîs kerd ke mi areq dayo. Ez wurişta mi areqê xwu kerd zuwa, kincê xwu yê binî bedilnayî. Û hetanî şan ez bêhal biya. Mi çend rey çaya nebatan şimite la nê, ez nêameya xwu. Çiyo xirab, hela şanî kixike dest pê kerd.

Şan de, mi ewnîya ke kixike ver ez îdare nêkena, mi fincanêk dims cezwe de girêna, nîm lîmone zî esirna ser û wina germin şimit. Qirika mi tedir nerm biye, kixike zî vinderte.

Ez kewta nivîne û tavilî şiya hewn a. Seba ke şewa verî ez ranêkewtbiya, eynî sey merdeyî, mi xwu nêdî.

Serê sibayî ez wurişta, saete heşt bî. Nişka ra ame mi vîr, vanê kesê ke bi korona bikewê nêeşkenê boye bigêrê. Ez wina lez şiya mitbaxe, mi fekê çend qewenozanê beharatan akerd, boya weşe ameye mi. Ez bineyke biya rehet, mi va ez bi korona nêkewta.

Ez vana mi serd girewto, çimkî hîrê rojî verê cû ez vejîyabiya teber, mi vatbi qey hewa weş o, coka mi yew monto tenik dabi xwu ra. La ez ke vejîyaya, vayêko serdin hetê koyan ra ameyne. Mi hîs kerd ke qerse gina mi ro la mi goş nêda.

Nika zincîya mi xetimîyaya, qirika mi zî seke tehrîş biya, vengê mi bedilîyayo, kixike zî esta. Labelê ez emîna a, nêweşîya korona nîya. Mi serd girewto.

Wey Çîno, to çi ard dinya sere de! 

Wulay-bîlay kabusê mîratê enê janê Çînî bîle merdimî beno a dinya û ano...