Duaya Dawud Pêxemberî

Dawud pêxember, Îsa pêxeberî ra teqrîben hezar serrî verê cû cûyayo. Miyanê qewmê Îsraîlî de Îbrahîm, Îshaq û Yaqûb pêxemberî ra dima sey pêxembero muhîm o çarin Dawud yeno. Îsa pêxember neslê Dawud pêxemberî ra yeno. Quran de hewtîyes rey nameyê Dawudî sey pêxember vîyareno. Homa Quran de di rey vano “… Û ma Zebûr zî da Dawudî.” (4: 163; 17: 55) Yew ayete de zî vano “Sond bo ke Zikrî dima ma Zebûr de zî nuşt ke ‘Evdê min ê salihî miheqeq erdî rê benê waris.’” (21: 105)

Zebûr de panc qismî û 150 mezmûrî estê. Nameyê Zebûrî manaya çiyê ke nusîyayê de kokê “zbr (زبر)” ra yeno. Mezmûr zî manaya vatişê deyîre/kilame/lawike/îlahî de kokê “zmr (زمر)” ra yeno. Zebûr kitabê mezmûr/îlahîyan o, zafê înan fekê Dawud pêxemberî ra yenê vatiş. Mesela, Dawud pêxember mezmûra 35ine de ehwalê xwu raşteraşt Rebê xwu rê erz keno û vera neyaranê xwu de ardim wazeno. Wexto ke merdim waneno her yew mûya canê merdimî bena sey goçînî. Merdim xwu rê vano, eger bi yew pêxemberî hende xirabîye biya û ey hende zerrî ra Rebê xwu ra ardim waşto, bi mi qûlê zeîfî hay-hay bena...

* * *

¹ Ey Rebê mi, dişmenanê mi dir dişmentî bikere

Û kesê ke mi dir şer kenê dir şer bikere.

 

² Zirxê xwu bipêşe, mertalê xwu bigêre

Û bêre ardimê mi.

 

³ Şimşêr û gurzê xwu bigêre

Û vejîya vernîya dişmenanê mi.

Soz bide ke ti do mi bixelesnê.

 

⁴ Kesê ke qestê canê mi kenê

Wa rezîl û riswa bibê;

Kesê ke wazenê zirar bidê mi ro

Wa şerm bikerê û apey biremê!

 

⁵ Wa sey mûxê simerî ke kewto vayî ver vila bibê

Û wa melekê Rebî bikewo înan dima!

 

⁶ Wa rayirê înan tarî û semetok bê,

Melekê Rebî wa binano înan dima!

 

⁷ Înan bîlasebeb mi rê dame rona,

Înan mi rê çale kende.

 

8 Wa felaket înan xeflet de bigêro,

Wa ê bi xwu bikewê çala ke înan kenda,

Wa uca de helak bibê!

 

⁹ Ya Rebi, ez do o wext şa bibî û keyf bikerî;

Çimkî ti mi xelesnenê.

 

¹⁰ Ez do bi temamê mewcûdatê xwu biqîrî:

“Ya Reb, yewo sey to esto?

Ti destê zalimî ra mezlûmî xelesnenê

Ti destê zorbayan ra mezlûm û feqîrî xelesnenê.”

 

¹¹ Kesê niyetxirabî ke eleyhê mi de şahidî kenê estê;

Bi zûran mi sûcdar kenê.

 

¹² Vera hewlîya mi de xirabîye bi mi kenê,

Mi tehn danê miyanê tenyatî.

 

¹³ La wexto ke ê nêweş kewtbî

Mi palas ant xwu û şîn girewt;

Mi roje girewt û nefsê xwu kor kerd.

Mi sereyê xwu çewt kerd û semedê înan dua kerde.

 

¹⁴ Seke ez semedê yew dostê xwu,

Semedê yew birayê xwu dua bikerî.

Sey keso ke semedê dadîya xwu şîn de bo

Keder ra paştîya mi çewt bibî.

 

¹⁵ Labelê wexto ke ez kewta tenge, keyfê înan ame.

Neyarê mi ameyî pêser;

Zaf kesê adîyî ke ez înan nêşinasnena.

Înan bêvindertiş ez tenkîd kerda.

 

¹⁶ Sey kesanê fasiqan, sey qeşmeranê tinazkaran

Mi rê dindanê xwu seqênayî.

 

¹⁷ Ya Reb, ti do heta key eno halê mi rê temaşekar bimanê?

Mi pencê enê şêranê haran ra bixelesne!

¹⁸ O wext, ez do cemaeto pîl de to rê şukir bikerî

Ez do miyanê qelebalixî de to rê hemd bikerî.

 

¹⁹ Kesê ke bîlaheq mi rê benê dişmen

Wa keyfê xwu bi halê mi nîyarê.

Kesê ke bîlasebeb mi ra nefret kenê

Wa qîçanê xwu beş nêkerê û yewbînî rê çim nêşiknê.

 

²⁰ Fekê înan ra yew vateyo dostane nêvejîyeno;

Derheqê însananê mehsûman de xeberanê zûreyinan vila kenê.

 

²¹ Çi yeno fekê înan vanê, mi sûcdar kenê û vanê:

“A ma bi çimanê xwu karê ke to kerdê dîyî.”

 

²² Ya Reb, se bi û çi qewimîya, to dî

Keremê xwu ra bêveng memane;

Ey Wayirê mi, mi tenya meverde!

 

²³ Ey Homayê mi û Wayirê mi

Semedê midafeaya dehwaya mi

Tavilî bikewe hereket!

 

²⁴ Ya Reb, Homayê mi, ti adil ê;

Eno semed ra nîşan bide ke ez heqdar a,

We dişmenê mi bi halê mi nêhuyê.

 

²⁵ Wa yewbînî ra nêvajê “Çiyo ke ma waşt, bi.

Ma heqê ci ra vejîyayî.”

 

²⁶ Kesê ke bi halê min o xirab şa benê, wa şerm bikerê,

Wa rîyê înan sûr bibo.

Êyê ke bi quretî vera mi de tîk benê,

Wa şerm bikerê û rezîl bibê.

 

²⁷ Labelê kesê ke mi dehwaya min a heqdare de destek kenê

Wa bi şabiyayiş biqîrê û keyf bikerê.

Wa semedê mi tekrar tekrar vajê

“Reb pîl o!

Silametîya qûlê xwu ra keyfweş o.”  

 

²⁸ O wext ez do medhê edaletê to bidî;

Ez do bi ziwanê xwu bêvindertiş to rê hemd bikerî. 

Teswîro temsîlî yê Dawud pêxemberî