Çerçî yo heme çî yo!

Di camêrdê zarşîrinê weşsuhbetî estê, zaf henekçî yê. Her di zî babîyê xwu ra yewek ê. Yanî wayê înan estê la birayê înan çin ê. Her yew dewêk ra yo. Heta yew kird yew kurmanc o. Ez her diyan zî şinasnena, rewna merhebaya ma esta.

Enê her di camêrdî yewbînan ra zaf hes kenê, zafê reyan piya geyrenê.

Çend rojî verê cû ma yew ca de piya roniştî. Nînan ra yewî va “Ti zanê, ma bira yê ha.” Êyê bînî zî tesdîq kerd. Va “Belê, ma bira yê.”

Mi bi dîqet bala xwu da rî û rûçikê înan ser. Wulay raşt zî pê mendêne.

Mi meraq kerd, mi va “Şima senî bira yê? Ti filan dewe ra, o bêvan dewe ra…”

Her di zî huyayî, va “Eynî o qeyde yo. Labelê ma bira yê.”

Mi israr kerd, mi va “Gereka şima mi rê îzeh bikerê, dê hela şima senî bira yê…”

Mi ewnîya hê binê zimbêlan ra bi mizirî huyenê, meraqê mi zêdeyir bi. Mi bi huyayiş va “Lawo şima vanê vajê, nêvanê ez şima kuwena ha!...”

Înan ewnîya ke ez israr kena, yewî va “Babîyê mi çerçîtî kerdêne. Ti zanê çerçî çi yo?”

Mi va “Ez şima rê ferhengê çerçîtî binusnî. Senî ez nêzana çerçî çi yo!” Û mi sey ziwannasan dewam kerd va “Bi kilmîye manaya çerçî; beqalo seyar. zemanêk, wexto ke wesaîtî çinê bî, çerçîyan teftalo werdi-merdi dekerdêne heqîbe eştêne xwu milî, yan zî dekerdêne sindoqan û wenayne herî yan zî qantirî û dewe bi dewe çarnayne, rotêne.”

O miyan de yew îdyomê ma zî ame mi vîr. Mi va “Vanê, çerçî yo heme çî yo!”

Her di zî huyayî. Camêrdî bi kînaye va “Wulay o qeyde bi; babîyê mi zî çerçî bi heme çî bi!” Êyê bînî zî sereyê xwu cêr û cor leqna, qala ci tesdîq kerde.

Mi va “Lawo şima ez tetirxanî kerda, dê vajê, şima senî bira yê? Wulay şima eynî pê manenê, hetta xuyê şima bîle yew o…”

Êyê bînî va “Zemano ke babîyê ci çerçîtî kerdêne, wexto ke ameyo dewa ma, keyê ma de mendo…”

Lahewle!...

Ez ancî fetilîyaya, mi dîqet bala xwu da şekil û sîmaya her diyan ser. Ez nêzana mi rê winî ame, yan raşt zî wina bî, zaf pê mendêne.

Mi va “Lawo oxlim, dadî û babîyê şima her dinan zî şiyê rehmet. Şima qey guneyê înan gênê?”

Va “Çiyêk nêbeno. Zaf baş kerdo. Eke winî nêkerdêne, ma xwu rê bê bira mendêne.”