Orisê Hesenqela!

Hesenqela yew qezaya Erziromî ya. Tirkan nameyê ci bedilnayo kerdo “Pasinler” la şar vano “Hesenqela”.

Tirkî vanê Hesen begê lajê Hecî Togayê mîrê Îlxanîyan 1339 de ena qela viraşta coka nameyê aye biyo “Hesenqela”. Labelê tarîxê Hesenqela şino heta çar hezarî serrî Mîladî ra ver, tu eleqeyê xwu bi tirkan çinê yo. Û nameyê "Hesenqela" û "Hesenkeyfî [Hesenkehf]" zaf pê manenê. Yanî raşt nîyo ke qela nameyê xwu yew kesê bi nameyê Hesenî ra girewto.

Hesenqela 1915 de kewta destê rûsan la badê ke Rûsya de îhtîlalê sosyalîzmî virazîyeno, artêşa rûsan apey şina û edarê 1918î de ancî kewena binê kontrolê artêşa Usmanîyan.

Kalikê babîyê mi Evdela 1915 de Hesenqela de şerê vera rûsan de şehîd kewto. O wext semedê Enwer paşayî welatê ma ra camêrdî heme arêdayê berdê cebheyê Qafqasan. Kaliko Evdela, birayê ci Mehmed Emîn û lajê ci Fetih zî tede dewa ma ra hewt kesî arêdayê berdê. Tenya ap Mehmûd [Çelik] eşkayo xwu nêdo dest. La dima ey zî qefelnenê benê heta Hêne, seba ke qefle şiyo, o tenya mendo, eskerê tirkan uca ey kişenê.

Seba ke zafê dewijanê ma şerê Hesenqela de şehîd kewtê, coka vateyê “orisê Hesenqela” hema zî dewa ma de sey nenge yeno vatiş.

Yew gravurê Hesenqela ke 1717 de virazîyayo.

Hesenqela