Derheqê Edaletî de

Her bawerî (îdeolojî) sey sîstemêko bêqisûr xwu nîşan dana la pratîk temamen ciya yo! Çimkî kamcîn bawerî ra benê wa bibê, eke bî muqtedir benê zalim. Coka îdeolojî/bawerîyê ke însanî semedê serkewtişê înan xwu helak kenê, gunîya xwu rişnenê û ganê xwu danê, eslê xwu de tenya Hesî anê war Husî benê diyar. Hende!

Vanê tarîx de tenya yew padîşa adil biyo: Nûşîrewanê Adil. Badê Mîladî serra 531 ra heta 579 tam 38 serrî hukimdarê Sasanîyan biyo. Mewlidê Kirdî de nameyê ey wina viyareno: “Hem bi qey Nûşîrewanî banêke / Bî di Kîsra de, tera eywanêke”.

Nûşîrewan zî verî zalimêko zaf şedîd biyo. Kamî derheqê ey de fekê xwu akerdo, keyê ci raşanayo kerdo xan-xirabe. Vanê wextê zalimîya ey de welatê ci pirrî xirb û pagî biyê. Pagan ser o kundê korî wendo! La dima sayeyê wezîrê ci de heş ameyo sere, fek zilm ra veradayo. Vanê, yew zingil banê eywana xwu de aliqnayo, zincîre pa wa girêdaya û taqê eywane ro hetê teberî ser veradaya war. Welat de kam ke yew şîkayet yan waştişê ci biyo, şiyo a zincîre kaşkerda, zingil cenito. Bi eno qeyde Nûşîrewanî fam kerdo ke yew wazeno ey dir qisey bikero, derdê xwu vajo. Venga ci dayo ardo xwu het, rasterast goşdarî kerdo û waştişê ci ardo ca. 

Vanê mergê xwu ra ver, epey wext cile de nêweş kewto. Hekîman se kerdo nêkerdo, ci rê yew derman nêdîyo. Nûşîrewanî vato “Dermanê mi goştê kundê korrî yo, kundo ke pagan ser o waneno!” 

Şiyê seraserê welatî ra geyrayê, la yew page nêdîya ke tede kund biwano. Yanî zemanê adilîya Nûşîrewanî de welatê ci hende biyo şên û mamûr. Ameyê vato "Ma welat de tu page nêdî ke tede kund biwano!" Ena xebere ser o bi zerrîyêka rehete rihê xwu teslîm keno.

Mixaîl Aleksandrovîç Bakunînî (1814-1876) vato "Şorişgêrê tewr fanatîkî bigêrê, îqtîdarê mutleqî bidêne ci, miyanê serrêk de do çarî ra bêterêr bo!" Coka karê însanan çin o ke vajê tewr rast îdeolojî/bawerîya ma ya! Ez vana edalet fam û ferasetê wijdanî de yo. La çi heyf ke wijdan zî êsîrê destê bawerî/îdeolojî û îxtîrasî yo...