Enayî

Ena çekuya 'enayî' ke tirkî de yena vatiş, erebkî ra yena. Erebkî de manaya 'bencil'ê tirkî de ya la tirkî manaya 'safek; evdal' de bikar anê. Ferhengê tirkî de manaya ci wina qeydkerde ya:

1.kolayca aldatılabilen, aşırı ölçüde aptal, bön, avanak

2.(kumarda) iyi bilmediği için ya da hileyi anlayamadığından, sezemediğinden sürekli ütülen (kimse)

Ma zî eynî mana da bişixulnê, ez vana zirarê xwu çin o.

Ma fek ena çeku ra veradê, ez yew meselaya ke mi sere ra vîyarta vajî. Zemanêk yew bufeya mi estbî, her ca ra zaf kesî ameyne mi het. Tengek bî, la ancî zî ge-ge ma çar-panc kesî tede roniştêne, bi saetan suhbet kerdêne.

Demeyêk yew wendekarê unîversîte ameyne. Ez nêvajî ça ra yo û hemşerîyanê ci nêdê şerme. Zafê reyan zî tam wextê nanî ameyne. Mi di porsîyonî kebab yan lehmecûnî waştêne, ma piya werdêne. Gama ke şiyêne, mi tayê pere û yew pakêta cixara dekerdêne cêba ci.

Ez vana belkî dades rey bi eno qeyde ame û şi.

Rojêk ancî vejîya ame. Ma nan werd, dima çay şimite. Wextê wuriştişî, ancî mi tayê pere û yew Parlament derkerdî cêba ci. Lajek tam ber ra vejîyayne xanima mi ameye. Mi xanime ra va “Ti xeyr ameya. Ronişe, ez şina lawabo û yena.”

Nizdîyê bufe de camî estbî, ez şiyêne lawaboyê camî. Ez gama ke şiya, mi ewnîya eno lajeko wendekar û yewna xort hê qisey kenê. Peyê lajekî ro mi bi. Mi bineyke lingê xwu sist kerdî, mi waşt ez goşê xwu ser nî, dê hela vanê çi. Mi dî lajekî a paketa cixara ke mi daya ci, ho akeno û hevalê xwu rê cixara îkram keno.

Hevalê ci bi tirkî va “Oğlum banqa mi soydın, nêrden geli bu Parlamen-parlemenler?” Ez tam vîyartêne, lajekê ma va “Enayiler sağ olsın!” Nişka ra ez sey bismarî ginaya erd ro. Ez fetelîyaya, mi yew awiro eynî sey jehrî da ci. Mi dindanê xwu qirçnayî. Feqet ancax ez eşkaya vajî “Eferim to rê!” û ez vîyarta şiya lawabo. Mi hem torbeyê xwu yê îdrarî hem madeyê xwu kerdî veng û ez ameya.

Gelo ez poşman biya ke mi enê lajekî rê hewle kerda? Nê! Esla, ez poşman nêbiya. Çimkî eynî seke mi uca ra ver kerdbi, tiya ra pey zî mi tim eynî çî kerdê. Eno karakterê min o. Ez nêwazena riyê çend bêkarakteran ra karakterê xwu bivurnî.

Gelo ez kewta ver? Belê. Hem zî zaf kewta ver. Bi rojan hewn nêkewt mi çimî. La ez nêkewta xwu ver, ez kewta reftarîya lajekî ver.

Heyatê mi seraser wina vîyart. Hem warê nûştoxîyê de, hem zî heyatê min o normal de, bi seyan kesê winasî heyatê mi ra vîyartê…