ŞAHIDÎYA HERFA “e”

Malmîsanijî bi sernameyê Derheqê Kirmanckî de Çend Îdîayê Bêbingeyî yew nuşte hûmara 72. ya kovara Vateyî de weşanayo. Tede raşteraşt şexsîyetê mi kerdo hedef, heqaret kerdo. Mi zî sey heqê xwu yê midafea yew cewab nuşt û Zazakî.Net de weşana. (http://www.zazaki.net/haber/btehemulye-2841.htm) Enê ra dima, tayê kesî bi yew hawayo organîze verdiyayî mi! Nika sey grûh êrîşê mi kenê... 

Ewilî Nadîre Güntaş êrîş kerd. Mi cewabê xwu de behsê yew detayî kerdbi ke nameyê kek Munzur Çemî zî tede vîyareno. Nadîre xanime êrîşê xwu de vana "Mesela kombîyayîşê Mamekîye de ez kî uca de bîya mi qet nêheşna ke mabênê mamosta Munzur û mamosta Malmîsanijî de çîyo ke To behs kerdo bîyo." Û mi bi zûrkerî îtham kena. La mi îsbat kerd ke a uca nêbî. Çimkî o wext Grûbe ra kesî a nêşinasnayne. Labelê Nadîre xanim, badê pey nêva “Roşan, ti raşt vanê, ez uca nêbiya, mi xelet vato.” (Ez texmîn kena ke kamî a dekerde ena xeletî miyan!)

O miyan de, kek Munzurî zî yew not şirawit ke ez Zazakî.Net de biweşanî. Mi weşana. (http://www.zazaki.net/haber/wastis-rastkerdis-2846.htm)  Bin de zî mi cewabê xwu nuşt. La Nadîre xanim, roja bîne girewt, tenya notê kek Munzurî kopya kerd û înternet de weşana. Yanî, seke Tirkî de vanê, yargısız înfazê xwu dewam kerd. Madem bêteref a, vana ez neheqîye qebûl nêkena, qey notê kek Munzurî tenya weşanena, cewabê mi nimnena?

Dima, Netîce Altun xoca Twitter de yew AGAHÎ weşana. Nameyê Remzîye Arslan zî bin de nuşto. La Remzîye Arslan Zazakî nêzana. Seke aseno, Netîce xoca mi bi zûrkerî îtham kena, mi sûcdar kena, heqaret bi mi kena, mi pîs kena…

Eger Remzîye Arslan xoca rîyê Malmîsanijî ra, vera mi de mehcûb nêbiya, eger her çiyî ra xeberdar nîya, newe pê hesyena, heta ke binê nuşteyê Netîce xanime de nameyê xwu dana nuştiş, wa mi rê telefon bikerdêne, bivatêne “Heval Roşan, nedir bu anlatılanlar!” Û Netîce xoca, eger binê tesîrê Malmîsanijî de nêbiyêne, do verî mi rê telefon bikerdêne. Dima, ancî eşkayne ena AGAHÎya xwu gelek kesan dir etîket bikero û Twitter de biweşano. Numreyê mi enê her di xaniman dir zî esto.

Eno uslûb yê Netîce xoca nîyo! Ez aye weş şinasnena. Ma Twitter de kewtî minaqeşe. Cewabê ke dayê ra zî zaf eşkera bellî beno ke yewî a fît kerda!

Kitabê mi Netîce xoca dir çinê yo. La Netîce xoca, kitabê mi ra fotografê yew rîpelî zî kişta AGAHÎya xwu de ronayo. O rîpel de, yew detayo qijek esto ke bala her kesî nêşina ser.

Mi kitab de wina nuşto: “Weş bi, ne? Wş bi!” Seke aseno, uca de herfa e kêmî nusîyaya. Û keso ke kitabî ser o şixulîyayo, a çeku zî temam kerda! Eno karê Netîce xoca nîyo.

Nuştişê karakterê herfa e ra zî merdim eşkeno îsbat bikero ke kam kitabî ser o şixulîyayo, kamî binê tayê çiyan xêz kerdo û fotografê rîpelî anto, Netîce xoca rê şirawito.

Kamî Netîce xoca fît kerda, kamî Nadîre xanim û kek Munzur fît kerdê, kam enê xortanê bînan jehrî keno, organîze keno, nuştoxê ena herfa e yo! Ena herfa e veramedê!

Nika ma bala xwu bidê Netîce xoca ser. Twitter de, mi wina cewab da AGAHÎya aye:

“Aşmêk verê fuare, beledîye weşangeran dir kombiyayiş kerd. Ez bi xwu zî tede biya. Uca, bi teklifê mi, qirarê panelê Zazakî diya. Înan bi xwu va “Ti zî beşdar benê.” Înan va “Ma Remzîye Arslan û Netîce Altun wezîfedar kenê, ê to ra vanê.” Her di zî îdarekarê Komeleya Nuştoxanê Kurdan bî. Wezîfeyê organîzekerdişê panelê Zazakî diya înan. Coka Remzîye Arslan xanime mi ra va “Malmîsanij û Deniz Gündüz û ti beşdar benê.” Mi qebûl nêkerd. Mi va “Ez nîna, wa ê her di beşdar bibê.” Aye zaf israr kerd, ma gelek qisey kerd. Netîce, mi nêwaşt ez aye bişiknî. Mi qebûl kerd. Seba ke mi qebûl kerd, aye mi rê tekrar-tekrar teşekur kerd. La gama ke broşur vejîya, mi ewnîya ke nameyê mi çinê yo. A o wext, ez înan geyraya. La cewab nêda. Bin ra nêameyî fuare. Mi mesûlanê beledîye ra persa. Înan va “Xwu rê Malmîsanijî ra biperse!” Xwura ê wextan êdî Malmîsanij mi rê tam amebi xezeb! Mi kitab de îzeh kerdo…

Verî ke ez kitab de binusnî, min û Remzîye xanime ancî bi telefon qisey kerd. Esas, a mi geyraye. Mi erey ferq kerd ke mi geyraya. Dima, ez aye geyraya. Aye va “Telefonê mi destê tutî de biyo, bi xeletî to geyrayo.” Ma persê yewbînan kerd. Mi mesalaya panelî aye ra va û mi va “Ez to ra zaf şikîyaya, ez to ra heridîyaya!” Aye va “Ez nika ha meymanîye de. Ez to geyrena. Ma ronişê, rî bi rî qisey bikerê.” Labelê xwu bêveng kerd. Xwura çiyo ke Remzîye Arslan xanime mi ra vajo çinê yo ke! Vajo çi?

Mi derheqê panelî de zî detayî qisey kerdê. Eger ez yew çiyo ke bin pa wa çinê yo vajî, qey ez hende bidetay qisey bikerî, qey ez nameyê hende kesan bidî? Nuşteyê mi de nameyê Netîce Altun xoca vîyareno, la mi a sûcdar nêkerda. Wurişta grûhî dir, partîzanan dir êrîşê mi kena!...”

Seke ez vana, seke mi kitab de nuşto, eynen bi o qeyde yo. La nika ez persena:

-Netîce xoca, o wext endama panc serran ya Grûba Xebate ya Vateyî bî? Yanî Malmîsanijî dir xebitîyayne? Erê.

-Mi kitab de vato “îdarekarê Komela Nuştoxanê Kurdan bî.” Eno raşt o? Netîce xocam îtîraz nêkena. Çimkî raşt o.

-Mi kitab de vato “Înan bi xwu panel organîze kerdo la her di zî nêameyê.” Eno raşt o? Netîce xocam îtîraz nêkena, vana "Ez nêameya çunke keynaya mi zaf qicebî û îhtîmalo pîl nêweşe bî." Netîce xocam teyîd kena ke eno zî raşt o. Labelê vana "Remzîye Arslan amebî." Ma bifikirîyê. A bi xwu nêameya. Eyla senî zana ke Remzîye Arslan ameya? Ena çelîşkî ya! Ez enê vajî, linga Remzîye Arslan xoca nêameye a fuare!

-Ez kitab de vana “Ez înan geyraya, înan telefonê xwu girewtbi.” Netîce xocam ewilî vana "Mamoste, ti ro mi bigeyrê ez muhaqqaq ro to geyrena." La dima vana "Mi telfnê to nêdîyo." Helbet nêvînena, çimkî hem aye hem Remzîye xoca, her diyan zî telefonê xwu bin ra girewtbi. Ez zaf reyî înan geyraya: “Aradığınız kişiye ulaşılamıyor…”

-Ez derheqê organîzekerdişê fuare de, derheqê panelî de bi detay melumat dana. Pêro raşt ê? Erê.

Eyla çiyo ke vana “bin pawa çinyo”, çi yo? Bin, enê hemîne wa esto. Gelo çiyî wa çinê yo? Belkî vajo, to bi çimê xwu dî ke mêrikî zor da ma ser? Ez vana, mi bi çimê xwu nêdî, la elemeşkera meydan de yo!

Bêguman ez zî yew însan a, ez Netîce xoca ra hêrs biya, mi va ti partîzan a. Ewilî va "ez partîzanê ti merdim û partî nîya" la dima va "ez partîzan a." Dê biewnîyê, senî belayê xwu sawito enê mamostayî ra:

Netîce xocam, peynî de, mi ra vana "Tenê yew rey, tenê yew rey ti qebûl bikerê ke to şaşî kerda her kes do bawerî to bikero. Yanî şert dana mi ver!  

Ez wina fam kena:  eke ez özeleştiri bidî, vajî, mi cewab dayo Malmîsanijî, mi xeta kerda, ez bîat bikerî, o wext, her kes do bawerî bi mi biyaro! Eke nê, saldırıya devam!...

* * *

Rebê mi, ena dinya de zî a dinya de zî ti mi mehcûb nêkerê. Û çi keso ke bi niyetxirabîye zûrî, buhtan, nege, tofîr bierzo mi ser, ti bi fekê înan înan zûrker vejê. Û çi keso ke hesedê xwu ra mi rê dame rono, ti înan bi xwu bifînê a dame.